Дубайда «Астана» велокомандасының маусым алдындағы таныстырылымы өтті

Дубайдағы «Jumeirah Beach» қонақүйінде «Самұрық-Қазына» Ұлттық әл-ауқат қоры қаржыландыратын «Astana Pro Team» командасының жаңа құрамы көпшілікке таныстырылды. Баспасөз жиынына ҚР Велоспорт федерациясының президенті Дархан Қалетаев, команданың бас менеджері Александр Винокуров пен команданың негізгі велошабандоздары Винченцо Нибали, Фабио Ару, Ларс Боом, Мақсат Аязбаев пен Бақтияр Қожатаев қатысты. Дархан Қалетаев велокоманданың БАӘ-не келудегі басты мақсаты - «Дубай тур-2015» жарысына қатысу және араб әлемінде қазақстандық спорттың беделін көтеру екендігін атап өтті. Александр Винокуровтың айтуынша, 2015 жылға қойылған басты мақсат – беделді «Тур де Франс» сайысында көшбасшының сары жейдесін абыроймен ұстау. «Astana Pro Team» құрамында велоспорттың шетелдік жұлдыздары басымдық танытқанымен, негізгі командаға қазақстандық спортшылар да қосылуда. Оның ішінде Мақсат Аязбаев пен Бақтияр Қожатаев бар.