Дзюдодан үш елдің жастар құрама командалары Астанада оқу-жаттығу жиындарын өткізуде

Қазақстан, Қырғыз Республикасы, Германия елдерінің дзюдодан жастар құрама командалары Астанада бірлескен оқу-жаттығу жиындарын өткізуде. Бұл шараның жас спортшыларға берері мол. Үш ел арасындағы достық-ынтымақтастықты нығайту және спортшылардың өзара тәжірибе алмасуы мақсатында ұйымдастырылған оқу-жаттығы жиынына барлығы 75 спортшы қатысуда. Жаттығу жиыны маусым айының 26-на дейін жалғасады. Тамыз айының басында еліміздің Ұлттық құрамасы Берлин қаласында өтетін Халықаралық турнирге қатысады. Ал, алдағы күзде құраманың мүшелері үшін ең үлкен сынақ Маямиде өтетін Әлем чемпионаты болмақ. Аталмыш жиын - сол чемпионат алдындағы дайындықтың алғашқы кезеңі. Нұрбол Сүлейменов, дзюдодан Қазақстан жастар құрамасының аға бапкері: Бұл - елдер арасындағы тәжірибе алмасу, достығымызды нығайту. Оқу-жаттығу жиынына Германия құрамасын Ричард Траутманн бастап келіпті. Айта кетейік, Ричард Траутманн - әлемдік дзюдо тарихындағы ең күшті спортшылардың бірі. Жиын барысында Траутманн спортшыларға партерде мастер-класс өткізбекші. Ричард Траутманн, дзюдодан Германия жастар құрамасының аға бапкері: Қазақ дзюдошылары шапшаң қимылдайды және физикасы өте күшті. Бір айырмашылығы, сіздердің спортшыларыңыз қарсыласымен жақын байланыста белдеседі, ал, біз дистанцияны берік ұстанамыз. Стильдеріміз бөлек. Сондықтан, бізге көбірек тәжірибе алмасқан жөн.