Қазақстандық дзюдошылар арнайы Олимпиаданың еуропалық турнирінде 5 медаль иеленді

Ресейдің Санкт-Петербург қаласында дзюдодан арнайы Олимпиаданың ұйымдастыруымен ашық еуропа турнирі өтті. Қазақстан намысын қорғаған 5 спортшының барлығы жүлделі болды. Атап айтсақ, Серік Ахмет жарыс чемпионы атанса, Абылайхан Қалиев пен Данияр Сейітов екінші орын иеленді. Сонымен қатар, Дана Саутова мен Әлішер Азнабақиев қола медаль жеңіп алды. Сайысқа 11 мемлекеттен 90 дзюдошы қатысқан (Қазақстан, Өзбекстан, Эстония, Бельгия, Норвегия, Швеция, Польша, Венгрия,Нидерланды, Хорватия, Ресей). Айта кетейік, Special Olympics ұйымы ақыл-есі кем адамдарға спорттық шаралар өткізумен айналысатын мекеме. Аталмыш ұйымның атынан қазақстандық топты бапкер Рүстем Қарымсағұлов пен аталмыш мекеме қызметкері Ильина Галина бастап барды.