«Шахтер» мен «Ертіс» ел біріншілігінің «дөрекі» клубтары

Футболдан Қазақстан премьер-лигасының 20-шы тур қорытындысы бойынша қарағандылық «Шахтер» мен павлодарлық «Ертіс» біріншіліктің ең «дөрекі» клубтары атанды. Қос клубқа төрешілер 51 рет ескерту жасаған. Қарағандылық клубқа төрешілер 49 мәрте сары қағаз көрсетіп, 2 ойыншысын алаңнан қуған. Ал, «Ертіс» футболшыларына 47 рет сары қағаз көрсетіп, 4 футболшысына қызыл қағаз көрсеткен. Талдықорған қаласының «Жетісу» клубы 6 қызыл қағаз алып, ел біріншілігінде қызыл қағаз алудан көш бастап келеді. Ал, бірде-бір қызыл қағаз алмаған қызылордалық «Қайсар» ең тәртіпті клуб атанды. Төрешілер «Қайсарға» 31 мәрте сары қағаз көрсеткен.