Әлем чемпионатының логотипі ғарыштан таныстырылды

Футболдан 2018 жылы Ресейде өтетін Әлем чемпионатының логотипі ресми түрде жарияланды. Логотиптің алғашқы суреті жұртшылыққа Халықаралық ғарыш станциясынан арнайы көрсетілім арқылы таныстырылды. Логотипті таныстыруға арналған салтанатты шара «Кешкілік Ургант» бағдарламасында өтті. Сыйлы қонақтар қатарында Халықаралық футбол қауымдастықтары одағының (ФИФА) президенті Йозеф Блаттер, Ресей елінің Спорт министрі Виталий Мутко және 2006 жылы Италия құрамасымен Әлем чемпионатын жеңіп алған Фабио Каннаваро болды. Логотип қалың көпшілік назарына алғаш рет ұсынылды. Айта кетейік, төрт жылдан кейін дүбірлі дода Ресейдің 11 қаласындағы 12 стадионда өтеді.