Йонас Эрикссон футболдан Қазақстан Суперкубогының бас төрешісі болып бекітілді

2015 жылғы Қазақстан Республикасы Суперкубогы үшін өтетін матчтың бас төрешісі етіп щведциялық Йонас Эрикссон бекітілді. Эриксонға қапталдардан Даниэль Вернмарк пен Даниэль Густавссон көмектеседі. Эрикссон мен Вернмарк 2014 жылы Бразилияда өткен Әлем чемпионатында қызмет атқарған. Ал, Густавссон еурокубок ойындарында жиі төрелік етіп жүр. Резервтегі төреші қазақстандық – Артем Кучин. 2002 жылдан бастап ФИФА төрешісі атанған 40 жастағы Йонас Эрикссон Бразилиядағы Әлем чемпионатынан басқа, 2012 жылғы Еуропа чемпионатының финалдық кезеңінде, УЕФА Чемпиондар лигасында және өзге халықаралық кездесулерде бас төреші қызметін атқарған. Еске сала кетейік, «Астана» мен «Қайрат» арасындағы Қазақстан Суперкубогы матчы 1 наурыз күні «Астана-Арена» спорт кешенінде өтеді.