Дзюдодан Азия чемпионатында Қазақстан құрамасы төрт қола, бір күміс медаль иеленді

Кувейтте дзюдодан Азия чемпионаты аяқталды. Жарыстың соңғы күні командалық сайыс өтті. Қазақстанның ерлер және әйелдер құрамасы да қола медаль үшін татамиге шыққан еді. Алайда, қыздар құрамасы қытайлық Тайпейден келген спортшыларға есе жіберіп, Азия чемпионатында 5-ші орында қалды. Ал, Қазақстанның ерлер құрамасы қола жүлделер үшін моңғолиялық дзюдошылармен күресіп, 3:2 есебімен жеңіске жетті. Қазақстан құрамасы сапынан Елдос Жұмаханов (66 келі), Ислам Бозбаев (90 келі) пен Ержан Шынкеев (+100 келі) жеңіске жетсе, Дастан Ықыбаев (73 келі) пен Әзиз Қалқаманұлы (81 келі) қарсыластарын жеңе алмады. Осылайша дзюдодан Қазақстан Ұлттық құрамасы Азия чемпионатында төрт қола және бір күміс медаль иеленді.