Сочи - 2014 жүлдегеріне қандай сыйақы беріледі?

Астанада қазақстандық делегацияның шеф-де-миссоны – Қазақстан Республикасының Спорт және дене шынықтыру iстерi агенттiгi төрағасының орынбасары Елсияр Қанағатов Сочидегі Қысқы Олимпиада ойындарында жүлде алған Қазақстан спортшыларына қанша сыйақы берілетіні жөнінде айтты.

Оның айтуынша, сыйақылардың көлемі 2012 жылғы Лондон Олимпиадасында бекітілген деңгейде,  бюджет есебінен берілмек.

«Бірінші орын үшін - 250 мың АҚШ доллары, екінші орын үшін - 150 АҚШ доллары, 75 мың АҚШ доллары - үшінші орынға беріледі. Осылай алтыншы орынға дейін барады(30, 15, 5). Осындай көлемдегі сыйақыны спортшылардың бас бапкері де алады. Жалпы Олимпиадада алтыншы орынға дейінгі орындар жүлделі деп саналады», - дейді Елсияр  Қанағатов.

Айта кетейік, Сочи Олимпиадасына қатысу құқығын Қазақстанның 50 спортшысы жеңiп алды. Ел намысын қорғайтын спортшылар қысқы спорттың 10 түрiнен қатыспақ. Соның iшiнде шаңғы жарысы мен биатлонда он-оннан, мәнерлеп сырғанаудан - 2, фристайл могулдан - 5, фристайл акробатикадан - 4, шорт-тректен - 6, конькимен жүгiруден - 6, сноубордтан - 1, тау шаңғысынан - 4, шаңғымен секiруден - 1 және шана жарысынан 1 жолдама бар. Сонымен қатар олармен бiрге 40 адам жаттықтырушы және сервисмендер барады.