Финляндия хоккейден әлем чемпионы атанды
Словакияның Братислава және Кошице қалаларында өткен әлем чемпионаты мәресіне жетті.
Финалдық сында кездескен Финляндия мен Канада құрамалары арасындағы ойын 3:1 есебімен финдердің пайдасына шешілді. Ойындағы алғашқы шайбаны канадалықтар соқты. 10-минутта Теодор Ши мергендігімен көзге түсті. Екінші кезеңде финдер таразы басын теңестірді. 22-минутта Марко Анттилла қарсылас қақпасынан саңылау тапты. Үшінші кезеңде финдер тағы қос шайба салып ойындағы басымдықтарын еселей түсті. Шайба авторлары Марко Анттилла және Харри Песонен . Осылайша Финляндия құрамасы өз тарихында үшінші рет әлем чемпионы атанып отыр.
Бұған дейін Финляндия құрамасы 1995 және 2011 жылы чемпиондыққа қол жеткізген еді.
Қола медаль үшін таласта Ресей құрамасы чехиялықтардан матч соңындағы буллиттер сериясында басым түсті.
