Елена Рыбакина «Australian Open» жарысының финалына шықты
Әлемнің 25-ші ракеткасы Елена Рыбакина спорттық мансабында екінші рет «Grand Slam» жарысының финалында өнер көрсетеді. Жартылай финалдық кездесуде еліміздің бірінші ракеткасы Беларусь елінің өкілі Виктория Азаренконы (#24) екі сетте 7:6 (4), 6:3 есебімен жеңді. Елена бірінші сет барысында 5:3 есебімен ұтып тұрған еді. Алайда беларусь теннисшісі есепті теңестіріп, бірінші сет тай брейкке дейін созылды.
Екінші сетте сенімді ойнаған Лена ойын тағдырын өз пайдасына шешіп, «Уимблдон» турнирінен кейінгі екінші «Үлкен Дулыға» турнирінің финалына шықты. Айта кетейік, «Уимблдон» турнирінің финалында Рыбакина Тунис елінің өкілі Онс Жаберді жеңген болатын.
Финалдық кездесуде Еленаның қарсыласы тағы бір Беларусь теннисшісі Арина Соболенко болады. Арина төртінші мүмкіндігінен финалға шықты. Осыған дейін Австралияның ашық чемпионатының жартылай финалында үш рет ойнап, жеңілген болатын. Польшалық Магда Линетті 1 сағат 35 минут ішінде 7:6, 6:1 есебімен жеңген Арина спорттық мансабында бірінші рет «Grand Slam» турнирінің финалына шығып отыр.
Рыбакина - Соболенко ойыны 28 қаңтарға жоспарланған. Әйелдер арасындағы финал Астана уақыты бойынша 14:30-да Мельбурн қаласындағы «Род Лэйвер Арена» спорт кешенінде өтеді.
Елена финалға шығуы арқылы әлемдік рерйтингте спорттық мансабында алғаш рет әлемнің 10-шы ракеткасы болады, ал Арина болса 30 қаңтардан бастап, WTA рейтингінде 2-ші орынға көтеріледі.
Егер Елена турнирда жеңіске жетсе, әлемдік рейтингте сегізінші орынға көтеріледі.
Жартылай финалда жеңілген Виктория Азаренко 16-шы, ал 45-ші орында тұрған Магда Линетт әлемнің 22-ші ракеткасы атанады.
