«Еуразия Барысы» үшінші халықаралық турнирі 9 қазанда Тараз қаласында өтеді

Қазақ хандығының 550-жылдығына арналған «Еуразия Барысы» үшінші халықаралық турнирі Тараз қаласындағы «Тараз-Арена» спорт сарайында 9 қазанда сағат 11:00-де басталады, деп жазады ҚазАқпарат. Турнирге Қазақстан, Грузия, Қырғыз елі, Моңғолия, Польша, Ресей, Түркия, Өзбекстан құрамаларының палуандары қатысады. Әр команда бапкер мен жеті палуаннан тұрады. Салмақ санаттары: 55, 66, 74, 82, 90, 100 және +100 келіге дейін. «Еуразия Барысы» турнирінің телевизиялық көрсетілімі әлемнің 126 елінде миллондаған көрермендер алдында 7 сағат көрсетіледі. Турнирді халықаралық «ТРТ Аваз» (Түркия) және «Боец» (Ресей) арналары трансляциялайды. Ал, Қазақстандық жанкүйерлер «Қазақстан» Ұлттық телеарнасы мен «KAZsport» арналарынан тікелей эфирде тамашалай алады.