Қазақстан құрамасы «Үздік ұлттық құрама» номинациясында үшінші орын алды

Футзалдан Қазақстан құрамасы үздіктер қатарында. Futsalplanet Awards жүлдесіне таласта үздік құрамасы ретінде Еуропа және Әлем чемпионы Португалия құрамасы респонденттердің 416 дауысын жинады. Екінші орында Аргентина, олардың еншісінде 349 ұпай. 171 ұпай жинаған Қазақстан құрамасы үздік үштікті түйіндеді.

Сонымен қатар бас бапкер Рикардо Кака 193 ұпай жинап, бапкерлер арасынан үшінші орын алды. Бас бапкерлер арасында португалиялық маман Жорже Браз 386 ұпай жинап үздік атанса, аргентиналық Матиас Люкюикс 300 ұпаймен екінші орын алды,

Ұлттық құраманың капитаны Игита үздік қақпашы номинациясында 286 ұпай жинап, екінші орын алды. Бірінші орынды Игитаның отандасы Гуитта 299 ұпай еншілесе, үздік үштікті Николас Сарименто (Аргентина) 184 ұпаймен түйіндеді.