Ольга Хижнякова - Сурдлимпиада ойындарының күміс жүлдегері
Сурдлимпиада ойындарында ел қоржыны күміс жүлдемен толықты. Ядро лақтырудан Ольга Хижнякова Бразилияда өтіп жатқан жарыста 12.32 м нәтижесімен тұғырдың екінші сатысынан көрінді.
Таэквандодан Ұлттық құрама капитаны, 58 келіде сынға түскен Аян Әбдіраш қола жүлдені жеңіп алды.
68 келіде ел намысын қорғаған Нұрдәулет Жақып пен +80 келіде Фрундин Виктор қола жүлде иегері атанды.
10-шы жарыс күні Қазақстан үшін сәтті басталып, Фархат Қыстаубаев кедергілермен жүгіруден қола жүлдені иеленсе, Раушан Бейсебай сырықпен секіруден үшінші орын алды.
Ольга Хижнякова балға лақтырудан тағы бір қола жүлдені жеңіп алды. Осылайша Ольга үшін бұл Сурдлимпиада ойындарының екінші жүлдесі.
Қазақстан құрамасының еншісінде 1 алтын, 3 күміс және 15 қола жүлде бар. Жалпы командалық есепте 19-шы орында. Есту қабілеті нашар жандарға арналған олимпиада ойындары 15 мамырға дейін жалғасады.
