Дәметкен Келімбет пен Римма Волосенко олимпиадалық іріктеу турнирінде жарысты алғашқы айналымнан аяқтады
Иорданияның Амман қаласында бокстан Токио Олимпиадасына Азия/Океания аймақтық іріктеу турнирі басталды. Жарыстың алғашқы күнінде Дәметкен Келімбет пен Римма Волосенко жеңіліске ұшырады.
Әйелдер арасында 57 келіде сынға түскен Дәметкен Келімбет қытайлық қарсыласынан 0:5 есебімен ұтылса, 60 келі салмақ дәрежесінде жұдырықтасқан Римма Волосенко үндістандық Симранжит Каурге есе жіберді. Үнді боксшысы 2018 жылғы әлем чемпионатының қола жүлдегері екенін айта кеткен жөн.
Бүгін шаршы алаңға 63 келі салмақ дәрежесінде Зәкір Сафиуллин қытайлық Жанг Шанмен кездессе, 81 келіде Бекзад Нұрдәулетов Жаңа Зеландия өкілі Жером Помпеллонеге қарсы қолғап түйістіреді.
Олимпиадаға іріктеу турнирін «QAZSPORT» телеарнасы тікелей эфирде 5-ші наурыз күні сағат 15:00-ден бастап көрсетеді.
Фото: olympic.kz
