Илья Ильин жақын арада кәсіби спортпен қоштасатынын мәлімдеді

Қазақстандық ауыр атлет Илья Ильин Instagram желісінде жақын арада кәсіби спортпен қоштасатынын мәлімдеді.

«Мен жақында өткен Қызылорда облысының әкімімен кездесуде спорттан кетер уақыт келгенін және өзімді жаңа қырымнан көрсетуге мүмкіндік бар екенін айттым. Бұл бағыттардың бірі - спорттық менеджмент. Мен туған Қызылордам мен еліміздің барлық аймағында спорттың дамуына қомақты үлес қоса аламын», - деп жазды Ильин.

Илья Ильин - үш салмақ дәрежесінде төрт дүркін әлем чемпионы, жасөспірімдер арасында екі дүркін әлем чемпионы, Азия ойындарының екі дүркін чемпионы және әлемдік төрт рекордтың авторы.