Жәнібек Әлімханұлы ширек финалдан сүрінді (ВИДЕО)

Қазақстандық боксшы Жәнібек Әлімханұлы Рио Олимпиадасының ширек финалында жеңіліп қалды. 75 келіге дейінгі салмақ дәрежесіндегі кездесудің 1/8 финалында төрешілер бірауыздан әзірбайжандық Камран Шахсуварлыны жеңімпаз таныды. Кездесудің алғашқы раунды Шахсуварлының аз ғана басымдығымен аяқталды. Екінші раундта да қазылар жеңісті әзірбайжандық былғары қолғап шеберіне берді. Шешуші раундтың басында Әлімханұлы қарсыласқа бірнеше жойқын соққы бағыттағанымен , бұл жеңіске жеткіліксіз болды. Айта кетейік, бүгін тағы екі қазақстандық боксшы шаршы алаңға шығады. 69 келі салмақта Ұлттық құрама капитаны Данияр Елеусінов француз боксшысына қарсы кездессе, 91 келіге дейінгі салмақ дәрежесінде өнер көрсететін Василий Левит ресейлік Евгений Тищенкомен Олимпиада ойындарының алтын медаліне таласады.