Данияр Елеусінов - Рио Олимпиадасының чемпионы (ВИДЕО)

Төрт жылда бір келетін жазғы Олимпиада ойындарында Данияр Елеусінов ешкімге дес бермеді. 69 келіге дейінгі салмақ дәрежесінде бақ сынаған бокстан Қазақстан құрамасының капитаны Данияр Елеусінов Олимпиада чемпионы атанды. Қазақ былғары қолғап шебері ақтық сында өзбек боксшысы Шахрам Гиясовқа қарсы жекпе-жек өткізіп, 0:3 (28:29, 28:29,28:29) есебімен жеңіске жетті. Кездесу басталысымен отандасымыз ширақ қимылдап, алыстан, ашық айқасқа бармай алғашқы раундты өз пайдасына шешті. Екінші раундта да өзбекстандық боксшының жерлесімізге қауқары жетпеді. Шешуші раундты сауатты өткізген Данияр бұл жолы да Шахрамға еш мүмкіндік бермеді. Естеріңізге сала кетейік, бұл - Қазақстан қоржынына түскен 11-шы медаль. Нәтижесінде Қазақстан құрамасы 3 алтын, 3 күміс, 5 қола жүлдемен жалпыкомандалық есепте 17-орынға жайғасты.