Иван Дычко Рио Олимпиадасының қола жүлдегері атанды (ВИДЕО)

Рио-де-Жанейрода өтіп жатқан XXXI жазғы Олимпиада ойындарында бокстан ерлер арасында аса ауыр салмақта жұдырықтасқан Иван Дычко жартылай финалда ұтылып, Рио Олимпиадасының қола жүлдегері атанды. Иван жекпе-жектің алғашқы раундында ұлыбританиялық қарсыласы Джозеф Джойстан басым болды. Алайда кездесу тізгінін алғашқы секундтардан бастап өз қолында ұстауға тырысқан жерлесіміз екінші раундта британдық боксшыға есе жіберді. Шешуші үшминуттықта да отандасымыз ұтылып қалды. Нәтижесінде үш төреші де жеңісті Джозеф Джойсқа берді. Қорытынды есеп - 3:0 (29:28, 29:28, 29:28,). Айта кетейік, бұдан төрт жыл бұрын Иван Дычко Лондонда қола жүлдегер атанған еді.