Парижде 2024 Жылғы Олимпиада ойындарының ашылу салтанаты басталды

Парижде 2024 жылғы Олимпиада ойындарының ашылу салтанаты басталды.

2024 жылғы Олимпиада ойындарының ресми бөлігі ерекше форматта ұйымдастырылмақ. Алғаш рет спортшылар шеруі стадион сыртында, Сена өзенінде өтуде.

Спортшылар мінген қайық алты шақырымды жүзіп өтеді. Бұл сапар «Париж тарихы мен архитектурасына визуалды саяхат» деп аталады. Аустрелиц көпірінен шыққан делегациялар Сена өзенімен батысқа қарай бет алып, Эйфель мұнарасы маңындағы Трокадеро алаңында аяқталады.

Спортшылар шеруін айнымас дәстүр бойынша Грекия бастады. Түрлі мемлекеттер шеруі түрлі концерттік номерлермен көмкерілген.

Ашылу салтанатын француздық театр режиссері әрі актер Тома Жолли дайындаған. Қойылым сценариі соңына дейін құпия ұсталды және үш мың артист жұмылдырылған.

Әлемдік жұлдыздар қатарынан Селин Дион мен Леди Гага өнер көрсетеді. Әзірге, Олимпиада алауын кімнің жағатыны құпия ұсталып отыр.

Олимпиада ойындарында Қазақстан туын көтеру құрметі боксшы Асланбек Шымбергенов пен жеңіл атлет Ольга Сафроноваға сеніп тапсырылды.