Криштиану Роналду «Әл-Хиләлге» ауысуы мүмкін
«Әл-Наср» клубының шабуылшысы Криштиану Роналду мансабын Сауд Арабиясының тағы бір клубында жалғастыруы мүмкін. Бұл жөнінде франциялық Footmercato басылымы хабарлады.
40 жастағы шабуылшыға «Әл-Хиләл» қызығушылық танытып отыр. Клуб еуропалық жұлдызды қыста жарақатына байланысты қатардан шыққан бразилиялық Неймардың орнын басатын супержоба ретінде қарастыруда.
Роналдудың Әл-Наср клубымен келісімшарты 2024/25 маусымының соңына дейін жарамды. Бұған дейін БАҚ беттерінде тараптар жаңа шарттар бойынша келісімге келгені жөнінде ақпарат тараған. Жаңа келісімшартқа сәйкес, Роналду клубтың 5 пайыз үлесіне ие болуы мүмкін.
Алайда, 11 мамыр күні испаниялық Marca басылымы «Әл-Наср» клубы Роналдумен келісімшартты ұзарту жөніндегі келіссөздерді уақытша тоқтатқанын хабарлады.
