Әділет Алмат дзюдодан Азия чемпионы атанды

Қытайдың Ордос қаласында өтіп жатқан дзюдодан Азия чемпионатында ұлттық құрама спортшысы Әділет Алмат жеңіске жетті.

81 келіге дейінгі салмақ дәрежесінің финалында отандасымыз Тәжікстан өкілі Сомон Махмадбековті жеңді.

2022 жылы Астанада өткен құрлық біріншілігінде Данияр Шамшаев алтын медаль иеленген еді. Әділет Алмат үшін бұл Азия чемпионатындағы алғашқы жүлде. Ол 2023 жылы жастар арасында Азия чемпионы атанған.

Жарыс жолында қазақстандық дзюдошы 1/8 финалда Қырғызстан өкілі Шыңғысхан Сағыналиевті, ширек финалда Абылайхан Жұбаназарды, ал жартылай финалда Тәжікстан спортшысы Бехрузи Хожазоданы жеңді.