«Челси» клубының бас бапкері Лиам Росеньор қызметінен босатылды

Ағылшындық маманымен қоштасу туралы ақпарат лондондық клубтың ресми сайтында жарияланды.

Росеньор бұл қызметке қаңтар айында тағайындалған еді. Осылайша, 41 жастағы маман клубта 100 күннен астам жұмыс істеді. Оның қызметтен кетуіне АПЛ-дегі сәтсіз серия себеп болды. «Көктер» қатарынан бес матчта жеңіліп, бірде-бір гол соға алмады. Бұл ойындардың жалпы есебі — 0:11.

Қазіргі таңда «Челси» 34 матчтан кейін 48 ұпаймен турнир кестесінде жетінші орында тұр. Команда келесі ойынын 4 мамыр күні өз алаңында «Ноттингем Форестке» қарсы өткізеді.

Бас бапкердің міндетін уақытша атқарушы болып Калум Макфарлейн тағайындалды. Ол бұған дейін де Энцо Мареска кеткен кезде командаға жетекшілік еткен.