«Астана» ЧЛ екінші іріктеу кезеңін жеңіспен бастады

Елордалық «Астана» Чемпиондар Лигасының екінші іріктеу сынының алғашқы ойыны аясында даниялық «Мидтьюлланд» командасын қабылдап, жеңіске жетті.

Ойынды сергек бастаған Роман Григорчук шәкірттері ойынның 32-ші минутында Ласло Кляйнхайслердің алыстан бағыттаған жойқын соққысының көмегімен есепте алға шықты. Алайда, екінші тайм басталысымен даниялық клуб есепті теңестіруге мүмкіндік алды. 51-ші минутта астаналық қорғаушылардың қателігін ұтымды пайдаланған Викхэйм есепті теңестірді.

Жеңіс голын ойынның соңғы сәтіне дейін күтуге тура келді. Төреші қосқан қосымша уақыттың соңғы минутында тағы да Кляйнхайслер қарсылас қақпашысын жойқын соққысымен қапы қалдырды.

Енді елордалық ұжым 1 тамыз күні қарымта кездесу аясында Данияға барады.