Аргентина құрамасы Copa America турнирін жеңіспен бастады

АҚШ-та басталған Copa America турнирінің тұсаукесер ойынында Лионель Месси бастаған Аргентина құрамасы Канаданы 2:0 есебімен жеңіп, жарысты жеңіспен бастады. Ойындағы және турнирдің алғашқы голын екінші тайм барысында Хулиан Альварес (49 минут) соқты. Сонымен қатар жас аргентиналық ойыншы матчтың үздік ойыншысына берілетін сыйлыққа ие болды. Матчтағы екінші голды ойынның 88-минутында Лаутаро Мартинес соғып, өз құрамасына жеңіс алып келді. Команданың басты жұлдызы Лионель Мессидің еншісінде нәтижелі пас бар.

Лионель Месси Copa America турниріндегі 35-ші ойынын өткізіп, ең көп матч өткізген ойыншы болды. Сондай-ақ, Лео жетінші Оңтүстік Америка Кубогына қатысып жатыр. Ол өткен ғасырдың 40-50 жылдары ойнап кеткен Серхио Ливингстонның нәтижесін жаңартты.

Аргентина құрамасы А тобындағы келесі ойынын 26 маусым күні Чили құрамасына қарсы өткізсе, Канада Перумен кездеседі. Оңтүстік Америка Кубогының барлық ойындарын «Qazaqstan» және «Qazsport» телеарнасының тікелей эфирінен көре аласыздар. Бүгінгі ойын күнінде Перу – Чили және Эквадор – Венесуэла арасындағы ойындар жоспарланған. Ойындардың барлығын «Qazaqstan» ұлттық арнасының тікелей эфирінен тамашалаңыздар.

Айта кетейік Copa America турнирі АҚШ-тың 10 штатындағы 14 стадионында 21 маусым мен 15 шілде аралығында өтеді. Турнир 16 команданың қатысуымен өтітіп жатыр. Аргентина турнирдің он бес дүркін жеңімпазы және Уругвай да Оңтүстік Америка кубогында 15 мәрте топ жарған.