Осыдан үш жыл бұрын Аргентина Әлем чемпионы атанды

2022 жылдың 18 желтоқсанында Қатарда футболдан әлем чемпионатының финалы өтті.

Финалда қатарынан екінші мәрте Әлем чемпионы атануды көздеген Франция мен Месси бастаған Аргентина құрамалары кездесті.

Алғашқы таймда Аргентина толық басымдық танытып, Лионель Месси мен Анхель Ди Марияның голдарының арқасында 2:0 есебімен алға шықты. Алайда екінші таймның соңына таман Франция таразы басын теңестірді. Килиан Мбаппе 80 және 81-минуттарда қатарынан екі рет мергендік танытты.

Қосымша уақытта Месси мен Мбаппе тағы бір-бір голдан соғып, матч тағдырын пенальти сериясы шешті. Бұл жолы сәттілік аргентиналықтарға серік болды.

Осылайша Аргентина құрамасы өз тарихында үшінші рет Әлем чемпионы атанып, 1986 жылдан бергі ұзақ үзілісті аяқтады.