Қазақстан мен Жапония дзюдо саласындағы ынтымақтастықты нығайтуда: серіктестік туралы меморандумға қол қойылды

Мемлекет басшысының Жапонияға жасаған ресми сапары аясында Jenys Judo Club (Қазақстан Республикасы) пен JUDOs Nonprofit Organization (Жапония) арасында Өзара түсіністік туралы меморандумға қол қойылды.

Құжат тараптардың дзюдоны дамыту, жаттықтырушыларды даярлау сапасын арттыру, бірлескен білім беру және практикалық семинарлар өткізу, сондай-ақ дзюдоның құндылықтары мен философиясына негізделген Қазақстан мен Жапония арасындағы мәдени және кәсіби байланыстарды нығайту ниеттерін бекітеді.

Осы ынтымақтастық аясында Қазақстан алғаш рет дзюдоның отаны — Жапонияның ғылыми тәсілдеріне, заманауи білім беру жүйелеріне және жаттығу үдерісінің озық әдістемелеріне тікелей қол жеткізіп отыр. Келісім Жапонияның жетекші білім беру бағдарламаларымен, салалық мектептері мен университеттерімен, сондай-ақ дзюдоның әлемдік орталығы — Кодокан жүйесімен өзара іс-қимыл жасау мүмкіндігін ашады.

Меморандум қазақстандық спортшылар мен жаттықтырушыларды Жапонияға оқыту, біліктілігін арттыру және кәсіби дамуға жіберуді көздейді. Бұл Қазақстанда мектеп, балалар және кәсіби дзюдоны дамыту үшін шешуші маңызға ие.

Қол қойылған келісім стратегиялық сипатқа ие және ұлттық жаттықтырушылар даярлау жүйесін қалыптастыруға, отандық дзюдо мектебін дамытуға, сондай-ақ Қазақстанды әлемдік үздік білім беру және жаттығу тәжірибелеріне интеграциялауға негіз қалайды.

Меморандумның маңыздылығы мемлекеттік жүйелі бастамаларды іске асыру аясында ерекше арта түседі. 13 желтоқсанда Астанада Қазақстан Республикасы Президентінің тапсырмасы бойынша Халықаралық дзюдо федерациясының (IJF), Білім және ғылым министрлігінің, Туризм және спорт министрлігінің және Қазақстан дзюдо федерациясының қолдауымен жүзеге асырылатын «Judo in Schools» халықаралық бағдарламасына ресми түрде старт берілді.

Бағдарлама Қазақстанның жалпы білім беретін мектептерінде дзюдоны кезең-кезеңімен енгізуге және балалар бойында спорттың негізгі құндылықтарын — тәртіпті, құрметті және дамуға ұмтылысты қалыптастыруға бағытталған. Жапонияда қол қойылған келісім бағдарламаның халықаралық құрамдас бөлігін күшейтіп, оның ұзақ мерзімді әрі жүйелі дамуына берік негіз қалыптастырады.

Меморандумға қол қойылуы Қазақстанда дзюдоны дамытуға бағытталған дәйекті әрі мемлекеттік бағдарланған тәсілді, сондай-ақ спорт пен білім беру саласындағы халықаралық ынтымақтастықты кеңейтуді көрсетеді.