Қазақстан Армения құрамасына есе жіберді

Футболдан Қазақстан құрама командасы 2018 жылы Ресей жерінде өтетін Әлем чемпионатына іріктеу турнирі аясында Е тобындағы бесінші кездесуін Армения құрамасымен өткізді. Армения астанасы Ереван қаласындағы Вазген Саркисян атындағы республикалық стадионда өткен матчтың алғашқы таймында есеп ашылмады. Ал, екінші таймда матчтың 73-ші минутында Армения құрамасының капитаны Генрих Мхитарян есеп ашты. Бірінші голдың ізін ала екіншісін қарсылас командадағы Араз Озбилис ойынның 75-ші минутында-ақ салып үлгерді. Осылайша, бұл - Қазақстан құрамасының 5 тур бойынша үшінші сәтсіздігі. Команда қоржынында 2 ұпай, ал, топта ең соңғы алтыншы орынға жайғасқан. Өз кезегінде армениялықтар екінші жеңісіне жетіп, төртінші орынға көтерілді. Еске сала кетейік, Армения-Қазақстан құрамалары арасындағы матчты «Қазақстан» және «Kazsport» телеарналары тікелей эфирде көрсетті.